Likhna Bhool Gaya…

Kai dino se zehen me kuchh likhne ka khyal sa aa raha hai. Magar kya likhu? Kuchh khabar nahi. Sher-o-shayri likhu ya koi kavita? Geet likhu, kahaani, ya koi vyatha?

“Likhta hu kuchh kalam utha ke,

Likhta kya hu kya jaanu…

Sochta hu likhu apni kahaani,

Par is jeevan ko kya maanu?”

Aaj lagbhag ek mahine baad kuchh likh raha hu to socha ki kuchh anokhapan laya jaye. Main aksar likhne me apni hindi bhasha ka prayog nahi karta; kyunki hindi mujhe ek lekhak se geet-kaar bana deti hai, kavi bana deti hai, kahaani-kaar bana deti hai. Aur kahin se chutki bhar urdu chura ke mujhe shayar bana deti hai.

“Sochne ko hai bohat kuchh

lekin shabdo ki kami si hai.

Antarmann kehta hai mujhme

Zindagi kuchh thami si hai.”

Badi ajeeb baat hai na! Ki jis bhasha ki panah me main pala-bada, jisne mujhe itna kabil banaya ki uski baaki chhaviyon ke pratibimb ko main dekh saku, unhe samajh saku, unka aanand le saku; Aaj usi ne mere sath aisa khel khela hai ki main chah kar bhi uska istmal apne likhne ki bhook mitane ke liye nahi kar sakta. Lekin na chahte hue bhi na jaane kaise mere shabd padhne wale ke dil me utar jaate hain.

“Soch sakta agar main

ki main is duniya me kyun hoon?

Toh shayad ye sochne ke liye

Main is duniya me na hota.”

Sneh.

Advertisements